本文重點
動漫節今日開鑼,Kama(羅凱珊)早前表示無意出席,但昨日突然收到通知指她將與A.Lin及DaDa以漫畫造型造勢,Kama突然轉軚殺入動漫戰場,相信定必令一班「龍友」瘋狂!
早前Kama表示不會出席今屆動漫節活動,但昨日卻突然轉軚,有通告指Kama將會與A.Lin及DaDa為Xbox攤位造勢,三人更會聯同10位動漫女模在台上表演時裝騷。對於唔嫁又嫁,Kama說:「我都係突然收到通知,本來都冇工作,啱啱先知要去做嘢!(你扮咩?)我會扮女泰山呀!」
DaDa唔怕被搶風頭
而Xbox公關Jerald亦表示臨時加入Kama作為嘉賓:「其實因為上次Kama出席Xbox活動時反應好,所以今次都想佢可以做嘉賓,不過都係啱啱先開會傾成呢件事!」
另外,A.Lin及DaDa表示首次以Cosplay造型示人,對於早前Kama在活動上刻意與她們保持距離,A.Lin說:「上次係誤會,今次我好開心可以同Kama合作!我第一次Cosplay,原來都Carry到,大家都好滿意!」而DaDa表示與Kama同場不怕被搶風頭,:「大家都係一齊玩,都冇話搶唔搶風頭,我第一次着啲咁可愛嘅衫,希望可以帶新鮮感畀大家!」
文:專案組