身為運動服品牌Reebok代言人的容祖兒，昨日出席品牌與太陽劇團合作研究的JUKARI Fit to Fly、全球首創原創健身運動開幕活動，還即場示範多款凌空自轉動作，她笑言玩到大腿疲累。同場請來模特兒Jocelyn、Amanda S.、Marcella B.及「翻版徐子淇」鍾浠文（Zelia）示範新裝，其中Zelia示範時，右胸位置露出一片啡肉色疑似Nude Bra。事後她驚魂未定：「第一次發生呢啲事，好驚，唔知影咗啲咩！換衫時間好緊張，扯得件衫太低，所以露咗Nude Bra。」

Jocelyn（左）與Amanda S.同場示範新裝，活力十足。

鍾浠文自言向來只用Nude Bra，因認為乳貼不夠安全。

失魂漏着打底褲

現場目睹走光事件的Joey，指對方只是上衣移位所致，又自爆亦曾走光：「開演唱會時要Quick Change，但因為太趕，試過換完衫先發覺條打底褲仲喺地下！有次想靚啲撥番好（胸部）啲肉，點知撥得勁得滯，走晒光！仲試過緊張得滯抽高咗條底褲，露咗底褲邊！」雖然Joey表示換衫時一定有至少十對眼「監察」，但也有失手時：「最勁一次係喺演唱會爆呔，裏面只係着咗T-back，好彩Mani即刻畀條毛巾我！」

另外，有傳阿嬌因發現麥浚龍向女模發情慾短訊而分手，Joey說：「除非我真係知有咁嘅事，所以冇回應。（阿嬌有冇向你呻？）冇，佢好用心去排劇。」至於有指其廣告涉抄襲之嫌，Joey承認感到不快、愕然及尷尬：「下次揀導演，要好似揀男友咁小心。」她透露即將開拍新一輯廣告是一早計劃，非為補鑊而拍。