鄭希怡(Yumiko)原來非常玩得,面對一連串的「藝人大起底」問題時,相當認真!Yumiko回答棘手及貼身問題時,亦絕無忸怩,她自揭曾靠「絕食」減肥,求學時曾因為貪靚染髮犯校規,認真坦白!
童年及回憶篇:
問:有冇試過畀學校記缺點,或者畀訓導主任訓話?
答:有呀!試過染髮被扣分。
問:覺得舒淇同林志玲邊個性感啲?最性感部位喺邊?
答:舒淇,我覺得佢雙腳最性感,而且佢好有氣質,一個女星連同性都可以吸引到,同埋讚佢靚,真係唔容易,舒淇就可以做到。
解讀:嗰時讀中學為咗貪靚,試過用雙氧水染髮,搞到畀學校扣分,之後「拿拿臨」染番黑,做番個乖學生。
飲食題:
問:試過用乜嘢方法減肥?試過一日最多食幾多嘢?
答:試過絕食減肥!而最高紀錄係一日食七餐。
問:有冇偏食習慣?有咩一定唔會食?
答:苦瓜,因為真係好怕嗰陣苦澀味,點炒點煮嘅苦瓜都唔食。
解讀:17、18歲時真係試過絕食減肥,當時只係飲水,乜都唔食,因為當年覺得自己好肥,所以不停自我催眠話要減肥。(唔舒服?)好暈,之後幾日都唔想食嘢,幾驚自己患厭食症。
假設篇:
問:如果拍外景時,個公廁又臭又污糟又濕又暗,你寧願死忍定頂住照去?
答:我會照去。
問:遇着拍接吻戲嘅對手有口臭,你會唔會出聲同佢講?
答:我唔會出聲,只會請佢食糖,但我咁耐都冇遇過。
解讀:人有三急,如果公廁又臭又污糟,我都會照去,試過拍劇去啲樹林取景,結果踩中地雷,唔知係牛屎定係乜嘢嘞!我即刻攞紙巾抹走,呢啲嘢有時避唔到。