由於成龍入影壇之初還是黃毛小子，從沒想過要揚名立萬，所以改不改藝名對他來說根本不重要；當年只是機緣巧合才以洪金寶的「元龍」闖蕩江湖：「點解我當初用元龍呢個名呢？係因為朱導演（朱牧）叫，朱導演話：『既然元龍個名洪金寶唔用，你咪用囉！』」

羅維慧眼識英雄

成龍曾以「元龍」拍過《女警察》及《頂天立地》，不過發展卻遠不如其他師兄弟，曾經心灰意冷有退出念頭：「嗰時拍嚟拍去都冇成就，元奎已經跟緊徐小明做副武指，元彪發展得又好過我……所以最後我返咗澳洲；我由扮死屍，再由細中大武師咁做上去，之後做主角，然後又做番武師，起起跌跌咁，對呢行真係冇晒興趣，我覺得自己唔適合呢行……」

但俗語有云「柳暗花明」，正當成龍的信心、奮鬥心跌至谷底，生命中的貴人卻在此時出現，哪到底誰是他的命中貴人？此人就是當年的大導演羅維是也，成龍說：「我喺澳洲有日突然接到電報，羅導演話叫我返去拍《新精武門》，我咪返去囉！」

隨着這個電報，成龍的命運亦添變數。羅維認為唔怕生壞命，最怕改壞名，為求打造一個全新「人物」，決意捨棄「元龍」，另選用一個更有氣勢的藝名，但整個改名過程卻十分轉折。

無心插柳蟲變龍

且聽成龍細細道來：「羅導演話元龍，『完完』聲唔好聽，仲話唔怪之得唔紅，因為完蛋喎！跟住我揀過小龍、大龍、子龍同雲龍，佢哋全部都話唔好。好似李小龍死咗唔吉利、大龍唔好聽、子龍唔夠氣勢、雲龍又見首不見尾喎！所以咪叫我用成龍囉！初時唔敢用，因為驚成龍不成反成蟲嘅話，就會畀人笑，不過最後都係唔到我揀。」

雖然羅維滿懷信心，惟「有意栽花花不發」，改名後的「成龍」接下來的兩年，星途仍未見起色，正當他又想放棄，然後返澳洲的時候，一套《蛇形刁手》再次改變了他的命運：「我曾經講過畀兩年時間自己，撈唔掂就返澳洲，咁啱喺第二年，有人（吳思遠）搵我拍《蛇形刁手》，之後就開始有運行喇！依家睇番呢個用咗三十年嘅名，其實都幾好聽吖！」

學藝十年、拍戲逾三十年成龍，明白師傅發揚京劇的苦心，可惜時代巨輪不停地轉，要延續師傅薪火相傳的精神，必須有所變奏，方可配合時代步伐向前走。