早排小小So去睇首映，諗住專程去睇吓啲明星啦，不過就只係見到呢排新聞多多嘅o靚模畀記者圍住做訪問，講得出名嘅明星欠奉，等咗一陣，就見到寇鴻萍同埋佢個寶貝女唐貝詩（Lydia）到場，同行仲有一大班「疑似o靚模」嘅美少女跟住佢哋，不過睇真啲真係冇一個識。
不過在場嘅記者都統統照影，一問之下原來佢哋並唔係咩o靚模、潮模、藝能模，原來只係唐貝詩嘅o靚界朋友。寇鴻萍識得帶住咁多靚女嚟撐場，果然知道記者需要啲乜，佢仲好識做咁買埋爆谷畀佢哋食，通場飛搶盡風頭，不過原來囡囡唐貝詩仲醒目，喺入場之前嘅最後一刻仲掛住同在場記者Social，媽咪寇鴻萍叫極佢入場都聽唔到，繼承咗媽咪優良傳統嘅Lydia，果然係青出於藍！