洪天明、周家蔚、陳爽和周美欣昨日出席黃金海岸《黃金夏日游樂園》開幕禮，以泳裝Look行Catwalk，吸引大批龍友到場，場面墟冚。天明在活動上對緋聞女友周家蔚照顧周到，不時捉實對方玉手，以防她滑倒，反觀陳爽因冇人拖，在吹氣墊上滑倒濕身。期間天明玩到忘形，更出現「火車未到站」，雖然未拉好褲鏈，但無損其心情：「開心！夏天、舒服！（情侶檔？）我同周家蔚唔係第一次同台，但得我一個男仔有啲Dry。（唔開心周家蔚性感？）唔會，依家興，個個都性感。我都有周圍望，眼生出嚟係睇好嘢同唔好嘢。（周家蔚好定唔好？）佢哋幾個都好，我唔好。（有冇睇o靚模？）未，書展賣書OK嘅！派奶、派雪糕、刷牙就盡量唔好，唔好挑釁人。」

陳爽拒影刷牙相

周家蔚則力撐天明睇女仔：「佢鍾意講女仔，冇人陪佢講，係Dry啲！（唔呷醋？）男仔講呢啲好正常，唔講就唔成熟。我係女仔都會睇寫真，欣賞人哋Body，只要用欣賞角度睇，我覺得冇問題。」

首次行泳衣Catwalk的陳爽說：「我有節食收身，心情有啲緊張。（擔心龍友鏡頭？）接得Job就預咗，我打晒底。（會否影雪糕相、刷牙相？）拍劇做戲可以接受，私底下唔會。」