Toby：T Natalie：N 記者：記
愛情篇
唐詩詠和梁靖琪各自在娛樂圈發展了一段時間，但過去未曾合作過，直至去年才有機會合演電視劇《ID精英》，日對夜對便成為好姊妹。劇中二人同時戀上鄧健泓，但戲外竟齊聲說：「一定唔會！」提到感情事更雞啄唔斷，還自爆心儀對象。
T：我同Natalie好似掉轉咗角色，戲裏面佢好獨立，我好怕事；但現實中雖然佢係姊姊，反而要我照顧。
N：我鍾意演戲，因為可以做同現實唔同嘅角色。劇入面我哋會鍾意同一個男仔，但現實一定唔會。
T：肯定No！我份人好奇怪，揀男友毋須靚仔、有錢，只憑一份感覺去愛，愈簡單愈好，但一定要喜歡運動，你呢？
N：我鍾意一啲，細個會有特定類型，好似高大威猛兼靚仔，但依家又唔高大、又唔靚仔！
T：都得喎！哈哈哈。
N：係喎！但喺我心目中梗係靚仔啦！
耐心覓真命天子
記：你哋係咪講緊崔建邦？
N：嘩！呢樣梗係唔答。
記：崔建邦經常被影到夜蒲溝女，有冇嬲？
N：點會！大家係朋友，每個人都有選擇權，唔可以教人點做，既然佢覺得冇問題咪得，但作為朋友有需要都會傾吓！
T：愛情係唔可以由其他人代答，但愛情真係好盲目，即使有事發生，朋友無論點勸、點鬧，既然你都愛咗！人就係咁，愈叫你唔好愈要做，好似小朋友玩火咁，話畀你知好熱，但偏偏要掂，作為朋友只可以喺身邊默默陪伴，總之對方開心就得！
記：Toby都傳過幾次緋聞，包括苗僑偉（三哥）、吳卓羲同天翔，你點睇？
T：三哥好似我Uncle，同Uncle出街拖手真係冇問題，但人言可畏依家會避忌。而同卓羲好奇妙，互相疼錫大家，好似親兄妹，但一定唔會拍拖。至於天翔，我好想了解呢個人，因為佢好得意，成日做奸角，但點解個人會咁好呢？
記：咁欣賞對方，係咪有發展機會？
T：哈，我鍾意演戲，無論男男女女都有興趣觀察。我覺得每個女人都希望搵到真命天子，但尋找愛情係需要時間，明白你嘅人可能係做娛樂圈，但我盡量都唔想，除非一拍即合。你咪睇我平時男仔頭，我都敢愛敢恨，如果愛就會變得好小鳥依人。
N：以前我唔識處理感情，可能自細冇人管，所以好鍾意發小姐脾氣，激嬲好多男仔，仲試過喺街發爛渣。依家好咗好多，開始識得忍讓同體諒，我更憧憬將來有自己嘅家庭。