現時生活富裕的溫碧霞（Irene），原來小時候也有過一段不為人知的慘痛經歷！雖然事件發生在她五、六歲的時候，但由於太震撼，所以至今依然非常難忘：「呢件事我成世都唔會忘記，記得以前細個住調景嶺，嗰時屋企好窮，又有成八個兄弟姊妹，所以都好艱苦。有一日媽咪突然間奇奇怪怪咁一邊係咁喊，一邊帶我去見個叔叔。跟住個叔叔畀咗一疊錢我阿媽後，阿媽就叫我跟個叔叔走！佢話因為屋企環境差，個叔叔好有錢，跟住佢生活會好啲。我聽完之後覺得好驚，咪抱住媽咪一齊喊囉！因為當時我覺得無論幾窮，都唔想離開媽咪，亦唔想跟個陌生人走。之後個叔叔見我哋咁傷心，就好好人咁將筆錢畀咗我媽咪，然後叫我媽咪帶番我返屋企！個叔叔真係好好人，知我哋需要筆錢，所以無條件畀咗我哋。自從嗰次之後，我決定一定要努力做人同讀書，令屋企人生活可以得到改善。」
