做藝人好多時都要同異性一齊工作，難免會有身體接觸，唔好以為啲男仔有得攬女仔就好開心呀！小小So縱橫娛樂圈咁多年，真係見過唔少男仔同女仔合作嘅時候，淨係搭吓膊頭都怕醜到面都紅晒！好似早排去探「菠蘿」郭穎橋班咁，佢同個男新人一齊影相嘅時候玩到笑唔停，反而個男仔就好拘謹，要「菠蘿」做主動搭個男仔膊頭。休息時「菠蘿」仲同小小SoSo分享咗單笑料添！
菠 蘿：有次我同個男Model影相，佢就好似今次個男仔一樣，怕醜到成個人硬晒，淨係識坐定定喺度！
小小So：咁氣氛咪好尷尬？
菠 蘿：好彩我個人不嬲都好男仔頭，係好唔怕醜嗰隻，好似啱啱我都做主動啦！嗰次我見到個攝影師頭都痕埋，仲有少少忟嘅時候，個男Model依然係好生硬，我就做主動搭佢膊頭，之後個男仔先放鬆番啲咋！
小小So：女仔做主動，你唔驚畀人笑咩？
菠 蘿：冇所謂啦！出嚟做嘢最緊要大家開心，好似嗰次咁，影完相之後我仲同個男Model講：「頭先博咗你懵！唔好意思！」之後全場都笑到收唔到聲，可以令到大家咁開心，我自己都好興奮（口架）！
「菠蘿」身為女仔，唔單只唔介意做主動攬仔，仲識講笑話博咗人哋懵，搞到工作氣氛咁開心，果然識做人！