模特兒莊思敏同吳浩康（Deep）公開咗戀情，小小So都戥佢哋開心，起碼唔使再偷偷摸摸，又可以大方接情侶騷，仲可以公然打情罵俏，最難得Fans又唔介意，真係一舉幾得。
上星期係父親節，小小So之前四出行街，睇吓買乜禮物氹吓爹哋，咁啱同莊思敏傾開呢個話題，原來佢都愁緊買咩父親節禮物，之不過唔係愁買畀自己爹哋，而係唔知買乜畀阿Deep個爹哋，於是小小So咪一齊幫佢諗，諗咗幾樣佢都覺得唔啱心水，之後突然靈機一觸：「我知佢爹哋鍾意武術，或者可以送套功夫衫畀佢都好，一定啱佢用！」
小小So見佢咁落力諗送嘢畀「未來老爺」，即開佢玩笑話佢會冷落自己爹哋，點知佢話一早送咗：「我爹哋份禮物一早已買咗，前排慶祝咗兼送埋禮物，送咗恤衫同埋袖口鈕，呢份禮物阿Deep都有份Share。」佢同阿Deep都咁「愛屋及烏」，感情真係甜到漏，搞到小小So鬼咁羨慕！