長居美國的時裝設計師張天愛（Flora）表示，米高積遜的死訊在美國時間本月25日下午二時許公布，米高的寓所、米高父母的寓所及醫院聚集最多傳媒和Fans，由於Flora的寓所在米高父母旁，見證了最真實的一刻，她說：「當時我返緊屋企，喺車聽到有個西班牙人大叫『米高死咗』，我仲以為做乜咁大整蠱，點知返到屋企見到好大班人圍住米高父母屋企，先知係真，啲Fans攞住花，個個都喊得好淒涼，其實喺美國街上面好多人都喺度喊，尤其係黑人，真係好似死咗全家咁。（你有冇買米高倫敦演唱會門票？）講真，佢近嚟健康好差，成個人好似冇晒動力咁，我冇諗過佢會成功開到演唱會，身體好弱！」她表示在家附近曾見過米高的兄長，在家逗留一會便往醫院召開記者會。由於現場擠滿警察、記者、粉絲及市民，人數過多，警察為安全起見更將現場封鎖，除住客以外，嚴禁出入。

汪詩詩夢幻國度過夜

而八年前曾有幸到米高家過夜的汪詩詩，她稱因當年認識《火拼時速》導演畢特烈納（Brett Ratner），而畢導演與米高相熟所致，她說：「米高屋企一入到去，就有一間好似辦公室嘅地方，裏面有好多保安，我哋要簽約作實，不能夠喺入面影相，好似過海關咁。」

她表示與米高初見面時感到很緊張，而她入住的地方是專為客人而建的Guest House，在米高家度過一夜，品嘗了三餐，吃的都是傳統美式食品如漢堡包和意大利粉，最得意是有兩個巨型雪櫃，裏面有齊各式各樣的雪糕，米高有請她吃雪糕，只是她掛住玩沒有吃，而米高的家應有盡有，有動物園和私人影院，而米高則喜歡在私人辦公室內看電影，看罷整部《反斗奇兵2》，她說：「佢睇足成部電影，佢話自己好鍾意睇卡通片。（有冇見過佢嘅替身？）冇喎！不過佢好得意，長期戴住黑超，連睇戲都戴，其實佢真人好斯文又好怕羞，講嘢同動作都好慢，同台上嘅佢好唔同，（同佢傾乜？）講吓興趣和收藏，同佢相處之後，有好唔同嘅感覺。」