樂壇巨人MJ病逝，他曾於87年來港並到邵氏片場參觀，當時正於片廠開工的任達華更與他碰過面！華哥坦言見到MJ的第一個反應十分愕然：「因為邵氏好大，唔知佢會去邊度，點知最後嚟咗睇《書劍恩仇錄》！佢對中國服飾同物件都好好奇，仲對我着緊嘅龍袍好有興趣，摸完龍袍又摸吓我個光頭！我一直都好喜歡MJ嘅歌，所以見到佢當然合照同攞簽名，仲將張相放到好大，依家擺咗喺貨倉。（覺得MJ點呀？）佢真係好Nice，一啲架子都冇！原本我同老婆買咗飛會去英國睇佢嘅演唱會，依家冇機會。」華哥直言MJ離世一事，令他感到世事無常，寄語大家珍惜眼前人。

曾與甄妮茶敍

除了邵氏片場，MJ亦曾到清水灣錄影廠遊覽，當年接待他的便是汪明荃，還代表TVB送贈一個顯像管紀念品。對於MJ逝世，阿姐說：「我覺得佢係一位好有才華嘅音樂人，跳舞好好睇，通常有才華嘅人都短命，陳百強、梅艷芳同張國榮都係，真係好可惜！」她透露當年曾與MJ閒談及合照，更把照片放在她曾推出的書籍中。

MJ當年來港還與不少圈中人見面，邵逸夫更招呼他到其清水灣別墅茶敍，甄妮與王祖賢亦是座上客。對中國事物情有獨鍾的他，留港期間曾穿起龍袍，又去過民初街遊覽，當年有份跟他合照的包括自薦扮士兵的杜德偉、做宮女的鍾淑慧及陪MJ到民初街的梁珮玲（後改名為梁珮齡）等。

來港開騷告吹

其實MJ於93年有機會來港開個唱，張耀榮、陳淑芬與盛智文等三間公司一起邀他來港演出，但最後取消，張耀榮更將他列入黑名單。對於他突然病逝，張耀榮也感到難過及惋惜：「MJ嗰年答應咗嚟做，仲收埋訂金，但突然又話唔嚟，但有賠番晒所有訂金。（幾多錢？）一百萬美金架！轉眼已經十幾年前嘅事咯！本來諗住佢做完美國同英國巡迴後會嚟香港……唉……以後都冇得睇囉！睇着一個又一個天王巨星離去，好化呀！梅艷芳、張國榮、黃家駒、羅文、陳百強……依家連國際嘅巨星都買少見少！」而陳淑芬表示正接洽MJ的巡迴演唱會香港及中國站，豈料傳來死訊，接連兩次也舉辦不到，她坦言感到遺憾：「始終無緣。」當年米高訪港時，陳淑芬曾招待他幾天，給她印象是親切有禮：「特別第一次見面時，佢主動伸手同我握手，最深刻係出街必化妝，因其膚色並不均勻。」