吳雨霏情緒低落
心情好低落好想喊，叫朋友幫我撲飛睇佢七月個騷，但以後都冇好似佢咁嘅巨星！睇過佢嘅DVD，佢出場企喺度15分鐘冇講嘢，但歌迷叫到拆天，仲有幾十個歌迷興奮到暈咗被抬出場！
陳慧琳傷心落淚
好傷心，初時以為係惡作劇，之後同菲傭睇新聞至敢相信，菲傭開始眼泛淚光，我亦眼濕濕！原來大家讀書時已經好鍾意佢，佢所有專輯我都買晒，喺屋企翻睇緊佢嘅影碟悼念。
孫耀威無緣見面
接受唔到呢個消息，我好細個已經係米高迷，日日聽住佢嗰首《Heal The World》。曾經有機會睇佢嘅演唱會，可惜要去台灣宣傳睇唔到，惟有睇住Mr.嗰個MJ先啦！
劉美君懷念才華
好可惜，米高啱啱出道嘅時候已經覺得佢好有才華，唱歌好令人感動，直到依家都冇人似佢把聲，就知佢有幾獨特，希望米高過身嘅時候都係開心咁走。
G.E.M.讚台風正
好震驚！之前我嘅唱片監製笑我冇台風，畀咗成套米高積遜演唱會我睇，去學佢台風，好正！封佢做偶像，當知道佢嘅死訊，即刻Send咗『The King is gone！』畀我監製悼念佢。」
狄易達心情沉重
知道消息立即呆咗，個心沉一沉。每個跳舞嘅人知道都會好唔開心，我係米高忠實Fans，佢係前無古人後無來者。個天好似唔識做咁，點解唔畀佢下月做埋演唱會先？
王菀之遙遠祝福
好震驚！我本來已經約咗屋企人同啲朋友去英國睇佢嘅巡迴演唱會，依家計劃告吹，真係好難過，好失望！無緣欣賞佢真人演出，希望佢喺天堂平靜過日子。
古巨基模仿偶像
好唔開心，佢係一個傳奇，由細到大都買佢啲碟，佢嘅成就冇人能及。當年佢喺亞洲開演唱會，我特登帶埋細佬飛去新加坡睇，上次我個演唱會都學佢跳咗一Part Moonwalk。
Angelababy難以置信
難以相信，以為自己發緊夢，到咗呢刻都接受唔到，希望唔係真，影唔到相我唔會相信，之前有諗過同經理人去倫敦睇佢個唱，但因為英鎊太高最後冇買飛。
王友良幸睹風采
喺日本見過佢真人，喺Clubbing撞到佢，見到巨星偶像超開心！好細個時喺電視聽佢啲歌，都會同細佬跳舞，突然聽到佢逝世好愕然，好榮幸一生人可以有機會見到佢真人。
蔡卓妍欣賞貢獻
好震驚，非常可惜，樂壇又少咗一位天王巨星，佢多年嚟為樂壇貢獻好多，好懷念佢舞台上嘅演出，因為佢係全世界跳舞最好嘅男歌手，地位相信絕對無人能及。
安仔呆立當場
今朝喺台灣飛去內地，睇到新聞呆咗，99年米高去台灣開演唱會，我同蘇永康等買晒飛，但媽咪身體唔舒服冇去睇。今年打算同張衞健去外國睇巡迴，但永遠冇機會，希望佢安息！
