早於五歲已展開歌舞生涯的米高積遜，以精湛歌藝及勁舞紅遍全球，更創立不少獨門舞步，包括Moonwalk、45度傾斜不倒及抽下體等，成為全球藝人的模仿對象！自八十年代開始，圈中不少「舞王」視米高為偶像，努力鑽研他的舞技，包括香港的郭富城、杜德偉及蔡一傑、韓國天王Rain、台灣偶像羅志祥（小豬）、敖犬等，他們對偶像的逝世均深表難過。

除「鐵幕Look」外，城城亦曾以西裝重現米高經典動作。	早於八十年代已模仿米高的杜德偉，為了與對方合照而客串「臨記」。	蔡一傑不時將米高的經典舞步融入他的舞蹈中。

城城震驚唔接受

叱咤香港多年的「舞台王者」郭富城，每次舉行演唱會均大跳勁舞，對於米高逝世，他說：「聽到呢個消息好震驚、好愕然同好難過！因為佢離去得好突然，我一時間未能接受係事實，佢對整個世界流行樂壇所作出嘅貢獻，真係無人可以代替，我真係好難過！」

至於八十年代經常模仿米高舞步的杜德偉，昨日接受電話訪問時表示曾與對方合作：「我做咗佢Fans好多年，當年佢去無綫借片場拍一場皇帝戲，我啱啱拍緊《城市故事》，見到佢即刻癲咗，想搵佢合照同簽名，工作人員叫我扮將軍，話可以企喺佢隔籬，最後我真係扮咗，仲影相影足兩個鐘添！佢好好人，喺張相同我件衫度簽名。」他還表示曾在溫哥華及日本欣賞米高演唱會，亦已購買下月16日的演唱會門票：「我買咗三千幾蚊嘅飛，退款會實際啲，人都唔喺度咯！」