馬來西亞實力派歌手曹格，今日會嚟香港出席記者會公布「處男」個唱安排，據知舊年10月，bma老闆羅傑承已經有意思同曹格搞騷，所以曾經秘密同佢摸酒杯底傾合作，當時仲有幾間製作公司加入戰團。曹格最後情歸bma，理由好簡單，就係有錢兼有誠意！據聞羅傑承為咗打動曹格，雖然只演一場，但都畀一大舊錢做歌酬，又揼過百萬元幫佢搞個舞台同音響，曹格見到咁筍，梗係OK啦！

被羅傑承誠意打動，曹格將香港處男個唱主辦權交到bma手上。	拍MV都如此落力，曹格今次來港開騷，歌迷更有耳福了！	曹格半裸跪地拍攝宣傳照。 黑白圖片

bma行政總裁崔永昌尋日喺電話度話，做到曹格第一個香港演唱會，全靠老闆羅傑承。問佢只演一場怕唔怕油水唔多？佢就話老闆最重視好嘅音樂，況且有贊助商力撐，賺少啲都冇問題咁話！

拍MV扮乞兒

另外，曹格喺新歌《掌紋》MV入面，為咗帶出命運掌握喺自己手中嘅意思，走咗去扮乞兒同爛仔，不過今次佢就有啲失威，因為食咗粒檳榔之後就見頭暈身㷫，問佢做乜做丑角咁大犧牲？佢就好搞笑咁話：「當歌手的終極目標是攞金馬獎！」