佩服勇敢監製
胡定欣認為演奸角或姣精無傷大雅,因為發揮機會更大:「好多人恨做反派,我遇到呢啲角色,可以話係不枉過,我喺《巾幗》入面偷情,連媽咪都入晒戲咁話『有冇搞錯』,真係好有滿足感!」所謂「一將功成萬骨枯」,胡定欣坦言那麼多監製找她演高難度角色,可謂一場賭博:「佢哋真係好勇敢,有時連我自己都冇信心做好,隨時會搞臭個角色,但佢哋都冒咁大風險搵個可能搵錯嘅人,我好佩服。」
有些演員,到退出仍是「戲屎」一名,但有些人卻天生懂得演戲,像跳班一樣跳過花瓶階段,胡定欣是後者:「好幸運,我嘅演技從來冇畀人插過,好多同事幫我、畀意見我,又有監製畀機會我,但啱啱入行嗰陣,因為太多懶音,成日將『香港』讀成『香趕』,『中國』讀成『中角』,搞到成日畀人鬧!有次做綜藝節目,有人話我『阿女,你咁多懶音,一世都改唔到喇!』講到我冇晒希望咁,但我唔忿氣,我知藝人要聲色藝俱全,更以聲行先,所以每日讀報紙改善發音,依家再冇畀人話喇!」
不敢奢望封后
要在電視城出位談何容易,不少花旦搞是非或緋聞,但胡定欣認為這些方法很不實在:「呢個圈子,每個人都有唔同目的,有唔同嘅生存方法,上位嘅途徑有好多,過到自己就得。」問到有哪些事情過不到自己,她即話:「出席某某飯局囉!做人都係實在啲好,雖然我成日做姣嘅角色,但我唔係乜嘢性感尤物,可能就係咁,從來冇人搵我去飯局,哈哈!一直都唔On List!」
胡定欣自言是一個沒有攞獎命的人,視后對她來說更是十分遙遠,奪得「飛躍進步女藝人」獎已是極大鼓舞,她不敢強求,只希望演出一個富傳奇性的角色便滿足。
夾吓馬國明
哪個女孩不想被愛?胡定欣與一般女生無異,都想有男朋友借出肩膊讓她倚靠,自從與吳浩康分手後,很多身邊人問她何時再帶男友出來,與馬國明傳緋聞後,總算找到一些端倪,但她依然否認與馬國明撻着:「我哋都未拍過拖,唔知夾唔夾喎!不過佢真係一個好人!」記者叫她嘗試「夾吓」馬國明,她即甜笑說:「哦!」哦……一切盡在不言中。
場地:海港城
服裝:Rebecca Taylor
髮型:Joseph Lui@Hair(胡定欣)