外表精靈的Suki原來是「懵豬」一名，做事迷迷糊糊，令人不知好嬲定好笑，以她的性格，要在電視城生存有點難度。剛出道的她演技幼嫩，更被踩是「花瓶」，但她不服輸：「我好唔鍾意人哋叫我花瓶，唔鍾意人哋覺得我得個睇字，我要建立自己嘅位置，既睇得又演得！」談及第二套劇集《緣來自有機》，她承認抵鬧：「有場戲話我畀男友撇，要我喊，但我Touch唔到，眼淚都流唔到一滴，又唔畀用眼藥水，累到全廠人等咗我成個鐘，雖然最後諗我隻貓死喊咗出嚟，但一啲都唔逼真，嗰次冇人鬧我，但我知實畀人藐啦！好過意唔去！」她續說：「監製仲同我講，話我個樣好似好Smart，原來真人唔係咁叻啫！嘩！聽完真係好Hurt！」
學演戲見成果
Suki自知資質有限，但沒有輕言放棄，起初她拍劇只是鬧着玩，直至拍攝《巾幗梟雄》，才覺得自己有太多不足之處：「我以前一直冇留意現場感，見雯女（鄧萃雯）、祥仔（黎耀祥）佢哋情緒澎湃，好易入戲，仲要冇NG喎！好犀利！自此之後，我開始愛上拍劇，想做得更好，我知自己做戲唔叻，所以加倍努力，上多啲堂學演戲，到我拍《杏林心處》時，聽到有人話我演得好，真係開心咗成日！」
Suki剛入行時經常撞板，令前經理人十分擔心，後來與王貽興傳緋聞，更令前經理人非常激心！她說：「佢知道件事之後好嬲，即刻打電話鬧我，當時我沖緊涼，唔敢聽電話，但始終要面對，咪叫家姐畀個電話我聽囉！當時我一絲不掛咁畀佢鬧咗成個鐘，最後搞到傷風！」她明白經理人為她好：「我知佢好錫我，當時仲有法拉、定欣、盈盈等上位花旦，但佢冇偏心，一手一腳湊大我，對我有恩。有次TVB藝人食飯，佢見我同啲唔應該黐埋一齊嘅藝人一枱，仲嬲到喊添！」
搞喊前經理人
直至現在，Suki還經常與前經理人見面：「我同佢成日出嚟食飯，依然仲畀佢鬧，哈哈！好彩有佢鬧咋！入行3年，以前我係一隻大豬，依家已經變成一隻小豬，有進步喇！不過，我都好多謝依家嘅經理人，雖然佢冇成日話我，但我知佢都好着緊我，好幸運遇到兩位好經理人。」
在電視城浸淫了幾年，Suki已練成「見人講人話、見鬼講鬼話」的神功，她說：「的確，有時喺化妝間，會遇到你同佢打招呼，但佢好冷淡對你嘅人，所以要識執生囉！」不過，她相信只要真心待人，最終會得到回報。
唔怕忘年戀
不少花旦都以視后為目標，但Suki未敢奢望，更自嘲與獎項無緣：「我人生第一個獎就係參選港姐時攞嘅旅遊大使獎，其他獎都未攞過，視后？諗都未諗過，我反而想建立一個多人鍾意嘅徐淑敏！」
自去年跟中坑男友黃重生分手後，Suki一直感情空白：「有啲嘢過去咗就算喇！我情緒好易受影響，最怕感情間嘅角力，以前睇得愛情太重，連經理人都話我傻女！」不過，她對忘年戀的睇法，未有因失敗過而改變：「我冇話會怕囉！年紀唔係一個問題，最重要係對象認唔認真。」