前晚《第六屆勁歌王全球華人樂壇年度總選頒獎典禮2009》喺成都舉行，英皇橫掃二十七個獎成為大贏家！英皇一姐容祖兒同啱啱加盟嘅英皇一哥古巨基分別奪得「勁歌后」和「勁歌王」大獎，祖兒仲打破埋大會紀錄成為六連霸「勁歌后」！羅志祥同蕭亞軒分別成為國語「勁歌王」及「勁歌后」。祖兒、衞蘭、楊千嬅、周筆暢及蕭亞軒各奪三個獎，而成為「勁歌王上王」嘅黎明以三個半獎做咗男歌手大贏家，不過佢就冇到！

祖兒成為六連霸「勁歌后」，認真犀利！

祖兒、基仔及阿Sa吻賀壽星女鍾舒漫（右四）。

金牌大風玩杯葛

剛剛同媽咪去日本過生日嘅祖兒，又喺飛機上遇到黑人，對方仲問佢攞電話，「黑桃花」勁旺，不過佢即時婉拒對方。而一班英皇歌手喺慶功宴上，送上香吻為尋日生日嘅鍾舒漫慶祝，問到緋聞男友張致恒有冇送禮？佢話未收到。此外，唔知係咪因為不滿賽果，金牌大風同Amusic缺席慶功宴玩杯葛，頒獎禮總監陳向航同金牌發言人都解釋，因歌手翌日要搭早機，要提早返酒店休息。

另外，梁漢文尋日出席活動，問到喺頒獎禮同基仔互當透明，佢話有打招呼，只係大家睇唔到，但講咗句有「骨」嘅說話：「做朋友講緣分，啱傾傾多幾句，再熟落啲可以做兄弟，唔係太有緣分就禮貌打招呼。」