任達華、琦琦及任賢齊前晚一同出席OMEGA活動，問到女兒在父親節可有送上驚喜時，華仔說：「有個驚喜仲大！呢幾日個女忙於綵排兒童話劇表演，點知臨表演前兩個鐘取消，原來有兩個小朋友證實確診！最慘就係老婆講唔夠兩句就收線，我仲去緊表演場地，又搵唔到老婆，嚇死我！」

一家大細均留港的小齊坦言，回家一定會徹底消毒。

任達華女兒的同學證實確診，幸好晴佳安然無恙。 （資料圖片）

收即食麵賀父親節

在旁的琦琦續說：「嗰晚我哋即刻畀維他命個女食，又幫佢消毒，成晚冇覺好瞓，因為要留意佢有冇發燒同唔舒服！」華仔又表示將向劇組請一個月假陪伴提早放暑假的女兒，一家三口更會於今日到長隆野生動物園慶祝父親節，而女兒亦早已預備多份禮物送給他：「佢送咗五包即食麵畀我，不過問我攞番一包嚟食！又送咗畫、銀包同朱古力雪茄。」琦琦透露囡囡在畫上寫上「最愛是爸爸」，但她不會因此呷醋：「爸爸做嘢咁辛苦，應該要錫佢嘅！」

至於同樣身為人父的任賢齊則透露，由於太太及子女在港，加上本港出現多宗本地感染，令他十分擔心：「返屋企第一時間就係消毒、沖涼同換衫！呢排買得最多就係消毒藥水，因為台灣已經斷晒貨！」