年僅23歲的黃長發去年底搭上39歲兼育有一女的「鞋王」鄧劍群的三奶Karen。當初兩人愛得轟烈，男方甘願放棄事業，女方則與鞋王反面，遭人收車收樓兼大閂水喉。本月初，有傳長發難忍Karen太黐身而主動提出分手，連日來她不停發功向傳媒數臭長發，一直避而不談的長發昨日終於開腔接受本報獨家訪問。身穿便服現身的他在訪問時一直面露笑容，似乎未有被負面新聞影響心情。
記：記者 發：黃長發
記：當初同Karen拍拖知道自己係第三者？
發：大家係成年人，初初拍拖唔會計較年齡，只係覺得大家性格好似，佢又識少少法文，好有新鮮感，但絕對唔知佢有Boyfriend同個女，一齊咗一、兩星期後先知道，一早知就唔會一齊。
Karen父嗌死仔
記：係你先提出分手？
發：係，我最接受唔到佢屋企人唔鍾意我，佢哋由始至終都唔接受我，佢阿爸仲經常當面叫我死仔。
記：但有傳你哋係假分手？
發：唔會！畀機會我都唔會再見，因為佢冇尊重我同尊重我阿哥，佢屈我阿哥，但我都有責任。依家我改咗電話，想避開佢重新開始。如果將來喺街見到面最多都係Say Hi！
記：當初愛得轟烈，分手又要反面無情？
發：其實第五個月開始就有問題，日日鬧交，我忍唔住成日講粗口，我諗Karen有錄音。好擔心佢會騷擾我屋企人，雖然佢唔係咁嘅人，但有人教佢。
記：有傳Karen鍾意用錢箍住你，你係咪成日用佢啲錢？
發：請食飯唔會講話冇，但自己都有買禮物畀佢，冇得計較。以前拍拖兩個星期，Karen話送架開篷Alfa Romeo畀我，但我唔想欠佢話唔要，我屋企都唔會貪人哋嘢，佢叫我同居我都冇，呢幾個月成日出去食飯，畀記者跟被迫要自己揸車，錢愈嚟愈少，依家連車都賣埋。之前有話我想返TVB，其實冇諗過，下月會返新工，係一間法國麵包公司做PR，所有事重新開始。
記：你哋分手，係因為你鍾意呷醋？
發：Karen有好多男性朋友，所以我有啲呷醋，出街叫佢唔好望男仔！我有個男性朋友叫我要小心啲，因為Karen曾經電過佢！我當時在場都Feel到，但佢都唔畀我去朋友屋企，話我會識女仔。
記：有冇後悔？
發：冇後悔，始終開心過，無可否認佢係一個好好嘅女朋友，係我咁多女朋友之中最關心同尊重我嘅一個，但唔可以咁自私，分手就乜都數臭。其實佢都講過預咗唔會同我一世，只要盡量開心，但咁係錯，我係會諗長遠。
鍾意博見報
記：最近Karen畀人影到掉咗本情慾筆記，你覺得係咪專登？
發：我覺得係囉！佢應Keep住保護自己私隱，雖不會怪佢，但我好Hurt，我亦唔會再保護佢，同佢唔會做朋友。
記：Karen好以同人夾新聞博見報？
發：我體諒佢，以前我保護佢，但依家自己不斷受傷害，但唔會畀佢傷害到。
記：Karen成日哭訴，知唔知佢動機係咩？
發：我惟有祝福佢，講乜都要經大腦，唔知佢玩乜，佢一向同我講唔鍾意上報紙，反而話我成日報料，好無辜囉！
記：Karen話係長興建議你哋公開關係？
發：我阿哥一定唔會咁做，呢個係我主意，當初鄧生（鄧劍群）搵樂小姐（樂易玲），我怕對哥哥有影響，所以建議不如開記者會公開我哋關係。
與家人和好
記：你講過希望將來同哥哥搞時裝生意？
發：會！呢個係哥哥心願，同佢散咗係一件好事，有番自信，至少朋友讚我個人醒咗，同屋企人關係好番，見到媽咪笑、老竇亦同番我講嘢。
記：有傳Karen自殺同患有抑鬱症？
發：佢係有食安眠藥習慣，但相信佢唔會自殺，因為佢仲有個女，反而抑鬱症就一直都有，但唔嚴重，唔使食藥。
記：你同Karen都畀二奶告緊誹謗，點算？
發：我都好後悔，當時自己好蠢以為女友就乜都要幫，我講咗幾句就畀人告。
記：鄧劍群早睇死你哋好快分手？
發：唔介意鄧生咁講，Karen講過每個男人同佢一齊都唔會咁輕易畀佢走。
此外，Karen被指愛出風頭，她昨日否認：「以前咁多記者跟，如果我鍾意出風頭就化晒靚妝畀人影啦！（封嘴？）我唔會再做訪問，之前見鍾意嘅男人話我大話王，梗係要出嚟講嘢。」她表示與長發是和平分手，除了筆記外，所有與長發的東西也有留低，她說：「依家冇聯絡，但大家仲係朋友，知佢搵到工戥佢開心。」