19/06/2009

播放本新聞相關短片

林峰水池肉林股舞飛揚

本文重點
林峰前晚舉行首場處男濕身個唱,以粗帶T-back晒美股,瞓身在「水池肉林」中,未知是否怕緋聞女友鍾嘉欣呷醋,他不敢與索女貼身勁舞,反而與謝天華十指緊扣對唱!

前晚一連兩場《峯.情無限Let's Get Wet演唱會》,在紅館展開序幕,林峰演繹張學友及王力宏等名曲,並以多個型爆Look冧歌迷,當中以T-back最誘人,全場Fans尖叫!在濕身環節上,林峯與女Dancer及比堅尼女模浸於水池中,有歌迷帶水槍反攻!

舞王「Laughing哥」謝天華出場時,觀眾以為展開「舞戰」,但兩人竟十指緊扣情深對望、咬唇扮Cute唱Twins的《女校男生》,林峯說:「真係好嘔!」Laughing哥笑指「起晒雞皮」,唱到打冷震!其後Laughing哥獨唱時笑說:「就唱首Cool Cool哋嘅『Cool Love』(《酷愛》)啦!」至於王祖藍與農夫勁Rap時,祖藍再將林峯的緋聞擺上枱:「林峯大情人,佢老婆係鍾嘉欣!」

穿T-back晒Pat

騷後,問到為何不與比堅尼女郎辣身火併?林峯說:「落到水冇晒方向感,啲水咁凍,加上我好被動,怕大膽畀人話!」他更解構粗帶T-back之謎:「嗰兩舊係Pat Pat肉,我着咗條好細嘅褲喺入面,唔係腰嚟㗎!可能我Pat Pat生得高。(Pat Pat夠挺?)OK㗎!」問到為何不見嘉欣,林峯反問:「點解要有佢?(尾場出現?)唔知㗎!請咗好多人嚟。(介意緋聞被玩?)係公司情侶檔冇所謂啦!(嘉欣唔介意?)觀眾鍾意有效果就得喇!」為答謝歌迷,林峯專誠舉行簽名會冧歌迷。