「一夫當關、萬夫莫開」，以此形容于師傅最貼切不過，雖然他所當的關，要面臨五、六十隻馬騮的衝擊，但于師傅擅以「多角度」玩心理戰，所以即使馬騮兵團如何刁鑽，也不得不寫個服字。

穿窿報紙藏玄機

要剛入門的七小福日以繼夜練功自是苦事，故他們總會趁師傅不為意時「偷功減料」，比如掃堂腿只掃一半、走圓場不跟造手……不過「你有張良計，我有過牆梯」，絕非等閒之輩的于師傅早已看穿他們的板斧，滿腦子「小聰明」的他，經常故意扮打瞌睡，「欺騙」他們疏於防範，繼續偷雞，待露出馬腳後即送上藤條，可謂十分厲害。

二師姐元甫、三師姐元秋及以蠱惑見稱的元華，異口同聲不止一次中招：「師傅會一邊睇報紙，一邊住我哋跑圓場，其實跑圓場要配合埋造手，所以好攰(口架)！我哋以為佢睇緊報紙，咪放低隻手跑囉！點知原來份報紙有兩個窿喺度(口架)！係師傅特登整嚟偷睇我哋有冇偷懶。」

除了穿窿報紙，于師傅絕招可不少，元甫接着說：「有時師傅會戴住太陽眼鏡睇我哋練功，仲要郁都唔郁，我哋以為佢瞓着咗咪又偷懶囉！點知都係陷阱嚟嘅。」

元彪亦有蠱惑招

要令人心悅誠服，單靠武力鎮壓及妙計還不夠，精警金句絕對要有一兩手。比如「吃虧就是佔便宜」、「師傅領進門，修身在個人」、「如果你想吃繃蝦仁，就要給我好好的跳」。雖已是50年間的說話，他們至今仍銘記於心。

師傅如此嚴苛，大師兄元庭有匠體會，他說：「佢覺得我哋唔可以失敗，因為咁樣佢會好冇面。」

于師傅無疑是「小聰明」與「大智慧」兼備，但偶爾也有奇怪、偏執的一面，不是特務出身的他，卻有着特務的頭腦，小師弟元彪記得師傅最愛以收音器偷聽他們動靜：「佢一聽到有雜音就知我哋有冇傾偈或者瞓覺，不過我哋都唔笨，一聽到啪一聲，就知師傅開咗個喇叭，咁我哋就會即刻靜晒，有時又會用毛巾笠住個收音器。」

七小福學藝階段，師傅規定一律要以普通話溝通，以確保沒有人背後放暗箭，元華說：「師傅唔識聽廣東話，所以逼我哋講國語，等我哋冇辦法喺佢聽唔明嘅清況下講佢壞話。」

哪個小孩愛被狠打痛罵，縱是發揮小聰明亦難敵師傅的大智慧，忍無可忍下，惟有一走了之，哪管師門不師門，只管一股勁兒的在師傅五指山下溜走，便是解脫。