文：專案組　攝：倪立煌

Rainbow在名店外睇到眼甘甘，但始終冇幫襯。	為了儲錢，Rainbow坐在商場外捱麵包頂肚。	Rainbow近期工作量大增，奈何支出亦不小，所以慳得就慳。 資料圖片

年僅17歲的「美少女廚神」Rainbow，與方力申傳緋聞後一夜成名，工作量在數月內不斷上升，連即將爆發的水着寫真大戰亦有份！不過，原來成功上位未有為她帶來可觀收入，仍在求學階段的她雖不用養家，但要負擔日常生活開支，包括置裝、化妝及美容等，難怪收入所剩無幾。

捱麵包儲錢

記者日前發現Rainbow放學後獨自到尖沙咀逛名店，但全程齋睇冇買！望着名店手袋的她雙眼發光，但沒有勇氣入內選購，逛了一會後，她到商場外的櫃員機查詢戶口結餘，只見她面色一沉，未有提款便急急腳離去，轉逛超級市場食品部。面對林林總總的壽司便當，流晒口水的她依然齋睇唔買，售貨員見她眼望望，忍不住給她一件壽司試食，Rainbow即時四萬咁口，但試食後便離開，未有幫襯。

直至行到一間麵包店，Rainbow才捨得「扲荷包」，見她左揀右揀格價，可謂精明消費者！其後，她坐在室外的長椅上對着海食麵包，更拿出筆記溫習。記者上前問她為何「捱麵包」，她說：「冇呀！可以慳多啲錢。（近排見你有好多工作㗎？）唔係賺好多咋！我仲要畀晒自己嘅日常使費，所以要慳啲使，有剩都儲埋佢啦！」