模界人「材」旺盛，乜Cup都有，新面孔爭啲多到連小小So都認唔晒！大家都話口靚模侵入，影響唔少模特兒收入。有日小小So同名模陳碧舸（Bonnie）傾偈，佢都問究竟口靚字係褒定貶。經小小So話佢知係香港俗語，係好後生、細過20歲都叫口靚之後，Bonnie就話佢一直都知香港有唔少後生青春嘅模特兒出現。
Bonnie話：我最欣賞係Angelababy，又靚又後生，工作時都好努力用心。呢個市場好大，就算有品牌喜歡起用佢哋，唔代表其他模特兒冇機會，都會有其他品牌鍾意用。我唔認為係競爭，品牌要顧及品牌形象同客路，唔係話後生就一定機會大啲。
此外，喺內地練習體操十年、爭啲代表國家出賽嘅Bonnie，話當年因為身高過人先至無緣出賽，但之後能夠幫國家做籌辦體操比賽嘅工作，都叫做有成功感：「可能大家知我有體操底啩！早輪影春夏系列時裝，為表達飄逸感覺，擺甫士時要做出好多高難度動作，仲要超過180度、將隻腳向上、貼住面影。」佢話平時臨瞓都鍾意做幾下雙腳向上貼面嘅動作，佢講到咁易，但小小So聽到O晒嘴！