本文重點
近排啲口靚模成日着比堅尼，仲分黨分派搞出唔少是非，身為是非人物嘅Rainbow（胡心諾）不但冇影響形象，仲因為見報多咗，所以身價五級跳，由兩千蚊奀價升至五位數，認真唔講得笑。
近日口靚模界是非多多，早前Rainbow更聯同死黨Lavina（鍾蕙芝）杯葛E Cup Baby（劉欣宜），即時引起唔少話題，仲惹來唔少廣告商注意。Rainbow尋日喺經理陪同下到天后，為麥當勞新一輯廣告試鏡，除咗拍硬照外，亦商討合約細節，今次佢雖然唔使性感，但事前都做足準備，前晚仲特登早瞓。
機會接踵而至
若然事成，Rainbow今次係第一次擔正廣告做主角，據知佢之前都有拍廣告嘅經驗，不過只是大茄一名，酬金只得兩、三千蚊，今次廣告商盛意拳拳，出到五位數中價畀Rainbow，實行身價五級跳。
依家Rainbow行騷價仲急升到八千蚊，比堅尼騷仲不止呢個價錢。身價勁升，Rainbow早前有份為郭富城新片《全城戒備》試鏡，嚟緊仲有可能有漫畫公司喺動漫節為佢設計角色造型，睇嚟十七歲嘅佢唔愁出路噃！