鍾鎮濤（阿B）、杜麗莎及呂方昨日為吳君如及錢嘉樂主持的節目《星星同學會》擔任嘉賓，提到近日有外籍傭工斬死僱主的慘劇，目前也有僱用傭人的阿B即大爆早年跟外籍傭工的不愉快經歷：「當時我係請佢嚟湊我歲幾嘅仔，有次我哋一齊去美國，點之回程嗰陣佢帶咗囝囝上機之後，就自己『跳機』走咗！仲要之後我先知，原來佢偷偷收埋咗銀行寄畀我張提款卡，佢走之前仲喺我戶口提咗一筆錢！」問到可覺得對待傭工要像家人般？他說：「呢啲冇得防，請工人佢唔偷你嘢已經係好好彩，試過啲嘢放喺屋企耐冇掂，佢就會袋埋去。（依家個工人呢？）呢個好好，佢由我個女細個用到依家。」

談到未來工作，阿B透露將要到豬流感（H1N1甲型流感）肆虐的美國登台：「因為簽咗約，所以冇得唔去。（唔帶個女去？）唔得！大女暑假會去台灣做義工，老婆又會同埋我一齊去，細女喺香港冇人湊，所以會帶埋佢去，我哋會做足預防措施，就算喺機艙都會噴消毒嘢。」

呂方拒再提感情

此外，呂方表示不擔心被君如爆大鑊，他說：「我都冇嘢好爆！（感情事？）唔再講喇！都過咗去，依家我專注內地嘅工作，年底會舉行小型個唱。（寄情工作？）不嬲都係！」