郭富城同熊黛林（Lynn）嘅緋聞疑幻似真，外間覺得似層層，但城城冇畀正式名分阿Lynn，前排小小So見到城城，忍唔住八卦吓，但城城見「唔對路」就自動波轉話題，由阿Lynn講到去阿媽，佩服！
小小So：同阿Lynn點呀？
城 城：我哋係好朋友啫！
小小So：媽咪唔恨飲新抱茶咩？
城 城：媽咪鍾意睇我工作多啲，媽咪畀我感覺好重要，佢年紀大，身體唔好，呢樣令我最擔心。人大咗親情好寶貴，所以我要努力工作，做好成績答謝母親栽培。
小小So：阿Lynn……
城 城（半途攔截）：媽咪知依家係我事業嘅衝刺期，尤其呢個Moment係電影最黃金時間，再過十年就去到另一個階段，冇依家咁大變化，好似我部新戲《全城戒備》嘅角色同《父子》、《殺人犯》、《白銀帝國》好唔同。拍戲受傷最多係《風雲II》，上年喺泰國拍，幾乎每日開工都見血，套戲聖誕就會上，希望大家睇到我嘅努力。
城城一輪嘴由媽咪講到工作，仲幫新戲宣傳，令小小So甘拜下風！