12/06/2009

播放本新聞相關短片

琦琦帶囡囡郊遊抗流感

教育局昨日宣布全港幼稚園及小學停課兩周,琦琦與馬詩慧大表支持,琦琦更打算帶囡囡到郊外吸新鮮空氣,不過黎淑賢及吳婉芳則指安排打亂學習計劃!

銅鑼灣聖保祿學校有多名學生確診豬流感(H1N1甲型流感)後,教育局宣布全港幼稚園及小學停課兩周,令娛圈不少家長極為關注,琦琦說:「政府想大家有個安全啲嘅環境,咁都係好事,好多學生有補習,如果傳畀其他學校就大件事。囡囡唔使上堂,我諗住帶佢去郊遊!」

曹永廉停上親子班

馬詩慧則說:「呢個決定都啱嘅,起碼喺有機會爆發之前控制住,停課都幾開心吖!我個仔(小學三年級)啱啱考完試,可以休息吓!」另外,身為人父的吳家樂與曹永廉也支持停課,認為是吸取沙士教訓,曹永廉說:「我個小朋友雖然得一歲五個月大,但我哋都有帶佢上親子運動班,依家疫情咁嚴重,我哋唔會帶囝囝上堂喇!」

不過,黎淑賢指停課打亂了仔仔的考試安排:「聖保祿學校喺我屋企附近,真係好擔心,唔敢帶啲仔去銅鑼灣行街。大仔考試仲未完,我驚停課後,佢嘅書本知識會拋諸腦後,所以要求佢休息一星期就重新溫習。」至於吳婉芳更感不知所措:「細女下星期行畢業禮,周六就陪二女去英國做校服,依家學校只話停課,未講畢業禮安排,都唔知飛唔飛好!」

趙碩之擔心母校

另外,由幼稚園到中學亦在聖保祿就讀的趙碩之,對母校的疫情深表關注,問到會否返母校幫手清潔,她說:「學校派咗全體校工進行清潔,我幫唔到乜嘢手,如果疫情穩定後,學校有咩要我幫忙,我會義務幫手!」她寄語學生趁停課好好溫習,切勿荒廢學業。