10/06/2009

播放本新聞相關短片

家輝霆鋒做線人吸金

由英皇電影出品同發行嘅電影,喺影壇嘅成績斐然,而英皇稍後亦會開拍多部分別由謝霆鋒、張家輝、蔡卓妍同古天樂等主演嘅新片,令人期待! 文:影視組

英皇電影出品氣勢如虹,稍後會斥巨資開拍多部高質素電影!早前由謝霆鋒同張家輝主演、林超賢執導嘅《証人》贏盡票房口碑,英皇食住條水再搵林超賢執導,以原班人馬開拍《線人》,霆鋒喺造型上會有新突破,家輝就獲加插有難度嘅內心戲畀佢發揮。

另外,爾冬陞執導嘅《新宿事件》成績同樣出色,佢將會開拍《鎗王之王》,搵咗電影圈炙手可熱嘅蔡卓妍、古天樂、李冰冰同吳彥祖主演。拍攝前,古天樂同吳彥祖會接受特訓,務求將射擊高手角色做到最好。而洪卓立早前因為爆肺要接受治療,所以由佢同詩雅、陳家樂主演嘅《很想和你在一起》就安排喺今年暑假先上映。

猛片雄霸黃金檔期

此外,由英皇發行嘅電影《功夫之王》同《灌籃》喺香港成績理想,所以同「華誼兄弟」及周杰倫關係良好,稍後英皇亦會發行多部大片,當中有周杰倫同林志玲嘅《刺陵》、周迅同李冰冰嘅《風聲》、劉嘉玲嘅《狄仁傑之通天帝國》同埋成龍同王力宏嘅《大兵小將》,分別安排喺今年同明年嘅暑假、聖誕節同賀歲檔期上映,猛片一浪接一浪!