近年轉走可愛「日本妹」路線嘅傅穎（Theresa），成日一有時間就去日本Shopping。不過因為Shopping都幾嘥精力、時間同體力，小小So嗰日就虛心請教Theresa呢位日本通，究竟有啲咩奇招可以令Shopping嘅時候唔使咁辛苦，佢都好慷慨咁同小小So分享Shopping三寶：波鞋、拉鏈衫同甜品。
小小So ：我次次喺日本Shopping唔夠幾個鐘就好鬼攰，你平時點捱？
Theresa：梗係有方法啦！首先個袋一定唔可以重，如果唔係Shopping嘅興致起碼冇咗一半。另外一定要着波鞋，我試過着平底鞋同涼鞋都唔掂，行唔夠一陣隻腳就會好痛同好攰。千祈唔好諗住着波鞋試鞋嗰陣唔方便就唔着，情願試鞋時麻煩啲都要着。
小小So ：但係成日都要試衫好麻煩。
Theresa：所以一定要着啲易除嘅衫，例如有拉鏈嘅衫，你只要一拉開條拉鏈就可以好容易咁除到衫，咁樣你就唔會抗拒試衫。而且仲記住一定要飲多啲甜嘢同食多啲甜品，因為呢啲都係補充體力同精神嘅最佳選擇。