阿嬌前晚盛裝出席在澳門舉行的《登基加盟英皇娛樂盛典》，歡迎古巨基加盟英皇，心情靚爆的她，大方回應有關Edison的提問，反而師姐容祖兒及經理人霍汶希（Mani）大為緊張，不時在旁擋駕。

記者問阿嬌知否Edison返港，她輕鬆地說：「我唔會留意呢啲，但大家不停問，所以我都知佢返咗嚟。」問到對Edison高調回歸有何看法，在旁的祖兒急急擋駕說：「佢唔會答任何嘢。」而阿嬌亦表示不會再答有關Edison的問題，不過經記者再三追問，她終心軟表示接受Edison道歉：「接受嘅，但太遲咯！」自知口直心快的她，說罷即時補充：「哎吔！唔好意思，衝口而出添！不過係心底話囉！」她更大方送上祝福：「算啦！希望大家都過得好好啦！我都入咗化境咯！（傳Edison年底復出？）我都唔知佢做乜(口架)！」

唔抗拒再合作

雖然不知Edison「葫蘆賣甚麼藥」，但阿嬌表示不抗拒與他合作：「我諗公司會過濾一下，唔到我介唔介意。」不過，在旁的Mani斬釘截鐵地說：「我介意！」場面搞笑。問到會否覺得Edison在港很礙眼，她醒目地扯開話題：「我冇睇雜誌喎！啲封面咁亂，睇到我好頭暈，我情願睇Fashion雜誌。」記者笑指其緋聞男友麥浚龍亦很喜歡看Fashion雜誌，她即調皮地反駁：「祖兒都好鍾意睇(口架)」

阿嬌自言已開始適應面對傳媒，現時全情投入工作，不但要應付4個廣告工作及綵排舞台劇，年底更會出席公司舉辦的大型音樂會，但未知是否以Twins身份現身。