歐洲聯賽冠軍盃將會喺香港時間5月28號凌晨，假意大利羅馬嘅奧林匹高球場上演最終一戰，由西甲班霸巴塞隆拿對英超勁旅曼聯爭雄。究意邊隊會攞冠軍？不如睇吓娛樂圈中人點睇啦！
黃宗澤：「巴塞隆拿機會高啲啩！聽啲球評家講話今年巴塞前鋒好勁，有個人突破能力、又可以踢整體組織。至於喺決賽可以入幾多球？梗係愈多愈好啦！巴塞贏4:3就最過癮喇！邊個可以入到巴塞三球咁多？朗尼啩！我平時睇波就鐘意趴喺張床度睇，好舒服，如果場波悶嘅話就即刻瞓覺。決賽嗰日我應該要喺深圳拍劇，好彩導演都係標準球迷，希望佢嗰日可以早啲收工、第日晏啲開工啦！哈！哈！」
梁漢文：「我係紅魔鬼擁躉梗係捧曼聯啦！呢場波我估好大比數，曼聯贏3:2就最理想喇！巴塞隆拿冇咗馬基斯同丹尼爾，防守漏洞會好多，特別係右閘嘅丹尼爾唔踢得，大大削弱咗右路嘅攻、守力，佢唔喺度，老將傑斯唔憂冇表演機會啦！比賽嗰晚，我一早約咗成班老友落酒吧睇直播，邊飲邊睇波，人生一大樂事啦！為咗唔想錯過呢場大戰，我已經同公司講明嗰個時段有Job都唔好幫我接，真係誠意十足！」