傳因懷孕問題與老公梁朝偉鬧分居的劉嘉玲，上周獨自往杭州巡視業務，更甜絲絲地自爆因偉仔肖虎而收集有關老虎的物品，力證二人恩愛如昔！
劉嘉玲婚後努力造人，更笑言已填表向上天申請想要BB，不過，近日有傳她與偉仔因人工受孕或試管嬰兒問題鬧意見，幾乎鬧分居！上周，嘉玲獨自往杭州視察她代理的美國潮服時裝店Ed Hardy時，有求必應地與顧客合照，面對傳媒亦有問必答，笑容滿面，心情顯然未受影響。
為老公做收藏家
問到為何偉仔沒有同行，嘉玲說：「我哋咁多年都係咁，大家好獨立，好享受呢種相處方法。（你同偉仔算係一對唔普通嘅夫婦？）我哋好普通㗎！我喺屋企係管家，最叻煮大閘蟹，但偉仔唔鍾意我下廚，佢最鍾意我扮到漂漂亮亮，寧願自己下廚。」她表示代理這個時裝品牌，是因為品牌商標是一個老虎頭：「因為偉仔肖虎，所以我好鍾意收集有關老虎嘅嘢！」言談間大晒恩愛，粉碎婚姻亮紅燈的傳聞。
着貼身裙冇凸肚
未有老公陪伴的嘉玲，此行依然自得其樂，不但在西湖泛舟，還品嘗地道菜及到靈隱寺拜佛。談及造人大計，她表示順其自然，觀乎她腳踏6吋高踭鞋及纖瘦的身材，相信二人仍須努力。
另外，嘉玲上周六為VALENTINO的杭州新店開幕擔任剪綵嘉賓，同場還有內地名模劉丹及戴小奕等擔任模特兒，嘉玲身穿低胸貼身吊帶晚裝，並豪飲香檳，看來未有懷孕迹象。