播放本新聞相關短片

李蘊被網友冒名騙財騙色

本文重點
今年樂壇新人兼前組合Cream成員李蘊,日前畀人冒名喺網上招搖撞騙,對方仲同男網友進行Cyber Sex,不過呢個冒牌貨竟然係男仔,難怪李蘊大嗌「好變態」!

據讀者所指,網上討論區日前出現一位自稱係李蘊嘅網友開Post,得到唔少人回應,而佢同其中一位男網友仲傾得特別投契!不過「冒牌李蘊」唔單止扮可憐話唔見咗手袋,仲叫人送生日禮物畀佢,結果引起對方懷疑同埋網民嘅激烈討論!

內容露骨

其後,「冒牌李蘊」畀李蘊一個舊男同學揭發假冒身份,但事情峰迴路轉,兩個人最後竟然撻着,仲進行內容極露骨嘅Cyber Sex!而最爆嘅係呢位冒牌貨其實係一個男仔!有得悉事件嘅李蘊Fans不甘偶像被利用,喺討論區公開兩人對話,仲大鬧對方無恥!

記者就呢件事打畀李蘊,完全唔知情嘅佢又驚又嬲咁話:「啲人咁變態嘅!攞我個名去玩!但係好無奈,網上嘅嘢我控制唔到。」佢仲呼籲想同佢傾偈嘅Fans應該上佢個官網,唔好咁易相信網上自稱係「李蘊」嘅人,對金錢交易尤其要小心!