做藝人要帶領潮流，梗係乜要都試吓啦！不過如果好似江若琳（Elanne）咁乜都有理冇理就去試嘅，就未免太危險！嗰日小小So同Elanne傾開閒偈，發現佢除咗皮膚靚咗之外，仲清減咗唔少，細問之下先知道Elanne原來飲緊一隻內地出產嘅減肥茶，雖然隻茶名不經傳，又冇品質保證，但Elanne都夠膽走去試，認真「愛靚唔愛命」。
Elanne：呢隻茶真係好有用㗎，我飲完之後一日去到四次廁所，而且仲唔肚瀉添！
小小So：你有冇睇清楚啲標籤㗎，小心有副作用喎！
Elanne：唔驚，啲朋友飲咗都冇事，而且我都係為咗健康啫！除咗呢隻減肥茶之外，我以前仲食埋好多健康藥品，又試過食中藥補氣血呀！
小小So：一次過食咁多呢啲嘢，你唔驚弄巧反拙？
Elanne：暫時都冇事，但就成日畀啲朋友鬧我，話一次過食咁多藥落肚，到最後唔知邊隻有用、邊隻冇用囉！
小小So：你阿媽有冇鬧你亂咁食啲健康食品？
Elanne：有呀！佢畀我嚇到半死！所以我依家都改咗，淨係飲減肥茶！不過我都會叫啲Fans唔好好似我咁，乜都亂試，因為我啲體質異於常人㗎！