數年前，熊黛林（Lynn）挾「翻版關之琳」之稱來港發展，以超標的5呎11吋身形殺入模界，迅即成為「模界一姐」，還附送「天王嫂」名號！她與郭富城的戀情傳得鬧哄哄，更演變成圈中公開的秘密。不過，最近城城的紅顏知己、性感女神藤原紀香日本空運抵港，更與城城高調撐枱腳，「正印」Lynn卻未獲如此公開過，加上兩人仍只稱對方為好朋友，令人擔心「天王嫂」地位不保！不過，她仍信心十足，更坦認要在這圈子拍拖，不會選擇公開來保護感情：「會少好多麻煩。（怕節外生枝？）係呀！但唔好話我恨嫁，我都唔急！身邊好多朋友都未結婚。（夢想婚禮係點？）真係冇諗過，要靚同埋有驚喜囉！」雖與天王拍拖，但Lynn追求愛得簡單：「其實唔使話太富貴，錫我就得。（工作狂呢？）忙啲都OK！我唔係一個依賴型嘅人，唔需要成日見面，女仔都可以獨立。（財政呢？）哈哈，最好我嘅錢係我嘅錢，佢嘅錢都係我嘅錢！」
恨有浪漫假期
來港一帆風順，但背後離鄉別井的滋味有誰知？Lynn19歲時離家，今年正好是事業發展的十周年。本來沒有想過當模特兒的她，結果在命運安排下，一個人到上海參加《中國民族模特兒大賽》並得到季軍，她坦言當時心態只求一份工：「當初搵工冇諗過要做模特兒，因為我家鄉喺郊區，大家都好單純！嗰時讀完書開始跳舞，但之後太高跳唔到，諗住做老師但又要再讀書，為養家就參加Model比賽，先開始做呢行。」
十年間，Lynn由奀模變成「模界一姐」，但她卻否認一姐地位：「我唔係！係大家好錫我，畀好多工作我做。不過，如果要我再衝其他地方，我真係唔想喇！衝嚟呢度已經好辛苦，我唔再走遠啲，離開南京屋企愈來愈遠。」Lynn早已想放假抖一抖，就像早前出席太古廣場一個活動時，在郵輪背景下翩翩起舞，正是她追求的假期享受：「我好鍾意海，以前睇《鐵達尼號》嗰陣已經覺得喺郵輪好浪漫，依家冇時間放假，去南京就當放假，去海邊游吓水、曬太陽已經好開心。」
闖影壇有得着
雖然高呼不想衝，但Lynn去年首次進軍影壇參演《葉問》，事業更上一層樓。雖然未能憑該片入圍《金像獎》提名「最佳新演員」，但其演技已大獲好評，她直言拍戲最大得着是令感情更豐富：「真係學咗多啲嘢，做戲之後，表達嘅嘢出到嚟都唔同囉！唔係淨係識得擺Pose，唔係淨係識得一個表情。好多謝導演同子丹教我做戲。（事前有咩準備？）冇㗎！其實一部咁慘嘅戲，唔通成日掛住靚咩？喊得咁靚做咩啫！（行紅地氈感覺如何？）真係好緊張，上台頒獎時勁緊張，臨上台前幾分鐘先知同老闆（黃百鳴）一齊上台，仲同我講陣間會問我兩條問題，叫我諗吓點答，搞到我更加驚，事後都覺得有少少瘀皮。」
後記：走紅未變質
要成為模界一姐，除了靠實力，人緣也是重要元素。據非正式統計，曾與Lynn合作的廣告商、化妝師或髮型師，均對這位美人有讚冇彈，走紅了也未有變質，Lynn說：「我覺得你對人哋好，人哋先會對你好、先會尊重你，同人哋做嘢始終都係鍾意開心啲，唔鍾意見到人黑口黑面，見到都好尷尬。」