本文重點
劇集《巾幗梟雄》大受歡迎，雖然有網友喺TVB官方網頁度搵到「柴九」黎耀祥背後出現高樓大廈嘅相，但祥仔尋日出席紀念四川大地震一周年嘅書籍義買活動時，人氣依然爆燈。
以清末年代為背景嘅《巾》劇，外景場地多數係荒山野嶺，不過有網友喺TVB官方網頁度，發現到《巾》劇嘅穿崩相，背景離奇出現好多高樓大廈！網友仲惡搞鄧萃雯同商天娥嘅造型照，有師奶股神之稱嘅娥姐，被網友擺喺交易所背景前，相當搞笑！而原本喺海報度揸住算盤嘅雯女，就被移花接木，變成手玩「滑鼠」。
否認狂賺千萬
至於憑「柴九」一角而走紅嘅祥仔坦言，《巾》劇帶挈佢多咗工作，最近仲同迪士尼傾緊一部電影嘅配音。有報道話佢打算買名貴跑車，佢連忙否認，解釋只係經常行車展，仲透露自己已經有兩部車，所以暫時冇打算買第三部。問到係咪狂賺千萬？祥仔笑住咁話：「大家知喺TVB賺幾百萬唔容易！你話可信性幾低？總之我依家滿足！（想再拍電影？）唔想喇！以前拍過，唔係新鮮嘢，依家拍劇好開心同好滿足！」