呢排啲大節日輪住係咁嚟，啲商場真係熱鬧喇！不過市民喺商場睇騷就話開心啫！但啲公關就真係頭痕，因為呢排金融海嘯，佢哋都要就住Budget請嘉賓撐場，不過SoSo姐最近就收到風，話班公關終於遇上「救星」，就係嗰啲「生果」同「廚房姐仔」喇！一來佢哋上緊位、人氣夠，二來又平又正添！
話說有日美味天使香蕉（王淑玲）同美少女廚神Rainbow（胡心諾）出席一個商場騷，佢哋兩個着得性感唔在講，仲要好鬼識做，無論喺台上面做緊乜都好，只要佢哋嘅「雷達」探測到有鏡頭接近，就會立即擺晒甫士同笑晒咁影相，一啲都冇甩漏，所以唔單止大會攝影師影得興起，就連啲現場觀眾都畀佢哋吸引，個個衝上台邊起勢係咁影，群情洶湧嘅程度，令SoSo姐仲以為係邊位巨星駕到添！俗語都有話青出於藍，SoSo姐發現香蕉啲Fans多到不得了，一個咁簡單嘅商場騷，竟然都有成三十幾個Fans拉晒Banner捧場，仲要不斷大嗌香蕉嘅英文名Vanko，啲Fans咁有心，唔怪之得香蕉當日要着短裙、騷長腿贈興啦！