本文重點
【本報記者】「7」是曼聯的傳奇數字，以往一般球隊的10號，通常代表全隊最好波球員，但自從「神奇隊長」笠臣在上世紀八十年代出現，隨後曼聯的Icon級球星，包括「奧脫福大帝」簡東拿、「萬人迷」碧咸、「C7」C朗拿度均身穿7號球衣。皇馬要收購世界最受歡迎球會的最受歡迎球員，當然要向碧咸、C朗打主意。
助全球市場推廣
曼聯號稱全球最多Fans球會，近四代7號皆有型又好波：笠臣打不死精神極具感染力；簡東拿成為紅魔王朝的模範；至於被譽為有史以來商業價值最高的碧咸，出道以來一直是球迷至愛，市場潛力驚人，據聞他在○三年登陸西甲，為皇馬創造球衣銷量狂升三倍的神話，○七年他轉投美職球會洛杉磯銀河，23號波衫又輕易成為全球銷量最高球衣，證明曼聯7號擁有無限商業價值，難怪新7號C朗同樣被皇馬睇中。
假如以球技、宣傳作用比較，C朗是○八年世界足球先生，球技肯定不會輸蝕碧咸，其女伴轉不停的花弗新聞，更不時踩過界登上娛樂版頭條，知名度遠超一般足球員，對於皇馬的全球市場推廣策略，幫忙相當大。今次皇馬羅致C朗，除可增強球隊實力，出售波衫的收入、球會未來贊助費及表演賽的戲金必定大幅上升，無論是「C朗效應」抑或「碧咸效應」，都是皇馬高層期待的賺錢捷徑。