一夜成名張芮熙瞓身噴血

內地唔少人氣模特兒都冇正式受過訓練,又冇大公司支持,只係拍輯寫真或喺電視節目中做個二打六角色,便一炮而紅,好似嚟自黑龍江嘅靚女張芮熙,就係最佳人辦喇!

話說張芮熙喺2009年擔任世界拳王爭霸戰嘅擂台寶貝,負責舉牌同埋帶領拳手出場,由於芮熙外形煞食,深深吸引男士嘅注目,一班剛陽嘅拳手都唔及佢咁受歡迎,結果芮熙一夜成名,人氣急升。

口才了得

自此之後,芮熙便成為各大傳媒爭相追訪嘅對象,期間芮熙亦拍攝唔少靚相同寫真,滿足粉絲嘅眼球。芮熙身高有175cm,以及一雙40吋長腿,加埋豐胸翹臀,因而經常被雜誌邀請做模特兒,由於大獲好評,芮熙便順理成章當上模特兒。芮熙除咗人靚身材好之外,原來口才亦了得,擔任過唔少電視節目嘅嘉賓主持,及後電視台得知芮熙自小喜歡跳舞,更搵佢做跳舞比賽嘅評判,芮熙喺舞蹈界冇名氣,又唔係舞蹈老師,亦冇參加過跳舞比賽,但竟然可以擔任評判,可見其人氣爆燈,後來芮熙還擔任多個選秀節目嘅評判,真係紅到發紫。

人氣高企

芮熙除咗喜歡跳舞,原來佢亦係高爾夫球高手,成日去高球會打波,有人就話芮熙因為去高球會,至識到咁多廠商,所以廣告接個不停,不過芮熙唔理會啲閒言閒語,繼續努力工作,而為咗回報粉絲,芮熙每次拍攝寫真都會瞓身演出,冇話因為紅咗就收收埋埋,真係要性感、要剝衫都冇問題,所以芮熙嘅寫真噴血度極高,難怪人氣一直咁高企啦!

張芮熙Profile  

出生地:黑龍江 

三圍:34-24-36 

身高:175cm 

興趣:跳舞、高爾夫球

龍四海