馬場鎅女術

上回提到馬場溝女有幾筍，今期就要講講場內鎅女術，但首先閣下要搞清楚馬場地利。我性甸奴奉勸你親身去兩個馬場實地視察吓先好出動。事關馬場咁大，囡囡只會集中喺幾個地方，企錯位包你食白果。

舉例，沙田周日賽馬，男女馬迷朝早11點未夠就逼入場霸靚位，有利位置喺正看台終點欄杆位，事關嗰度最多馬迷為心水馬吶喊助威，你搵到靚位後大把獵物湧住出現，所以早啲去係值得嘅。個人認為有兩種女最易埋手，先係拍住幾件「西人」入場嘅竹升妹，佢哋圍威喂入場趁熱鬧，開賽後埋去一齊嗌，以佢哋嘅「開放」性格係唔會覺得你有不軌企圖嘅。更正嘅係隔籬「西人」都唔知你同囡囡噏乜，就算對方唔「騷」你都冇咁(火羅)嘛！我就試過不下10次埋到竹升妹身，雖然最後都啅唔到，但打招呼時又Hug又Kiss都幾開心！

假如你成功埋身，下場馬開跑前你就要拖女上去自動售票機，陪佢或教佢投注，若然對方都唔抗拒嘅，梗係要去埋Food Court邊飲邊吹水啦！之後開賽返落去就係閣下發功機會喇，無奈沙田位置比較「濕滯」，及唔上快活谷夜馬個Feel咁浪漫，嗰邊仲有職員主動行埋嚟賣啤酒汽水，有酒精嘅催化梗係易得手好多啦！完場再辣過跑馬地或「老銅」飲飲食食，食女都易啲！

第二種女係有隻佬嘅中女，一般人以為中女肯入場一定係愛死個男人，錯！經驗話我知，中女根本係無聊到冇嘢好做先入場，其實心底好想有人注意、有人關心，同有人陪佢吹水，可惜隻佬就掛住賭，因此只要你畀些少Gentleman風度出嚟，已經有機會。當然，即食梗係冇可能啦，但即時「抄牌」再WhatsApp攻勢，留嚟隔夜食都冇蝕底吖！

性甸奴

80後一名，天生好性，以食盡天下女人為人生唯一目標，口講重質，實情重量！誓要一日一女直至油盡燈枯。雖然先天能力不足，但靠後天壯陽餐單及經驗互補成為啅女達人！