太子搭上波士

第二朝我諗住早啲返公司收風，所以特登比平時早咗半粒鐘返工，諗住趁波士未返到比較方便，點知一入到Office，已經隱約見到波士房有兩個人影。我以為咁早返一定係清潔阿姐，但諗諗吓冇理由有兩個阿姐o架，於是就靜靜雞攝手攝腳咁行近啲，從窗簾縫偷望入去。不睇猶自可，一睇就想大嗌，我竟然見到太子同Richard喺度咀嘴！

原來波士咁醒目，同太子撻着咗，唔怪之得咩問題都解決晒啦！今次我真係枉作小人，仲諗住靠Judy拉攏太子添！勢估唔到太子原來玩呢味。咁都好，我以後跟住Richard就肯定冇死！

睇完咁綺麗嘅場面，都係靜靜雞走先，呢啲秘密梗係唔知好過知，唔係到時太子話要滅口咪弊！我Barbara出嚟撈咁耐，冇理由呢啲人情世故都唔識嘅！一於落街食個早餐，先至施施然上去開工。落到去樓下間Cafe，咁啱又撞到樓上Macy，個衰婆立即衝埋嚟：「嘩！咁早返工，轉性呀！」「係呀！你唔知我下個月嫁喇咩！梗係要轉姓啦！」佢個樣半信半疑：「你都會嫁，從來都冇聽你提過嘅？」「你估我事事都同你報告咩！你又唔係事事都同我分擔！」佢聽得出我唔高興佢上次托我手o架，唔幫我收風，惟有面懵懵帶過話題。

我點會放過佢，佢平時都抽得我水多，今次仲唔輪到我：「你唔使旨意借啲意叉開話題呀！」佢無可奈何：「咁你想點吖！」「好簡單啫！今晚由Happy Hour開始，直落晚飯、叫鴨，你嘅！」佢即時眼都凸埋出嚟！正一孤寒精！「是但你啦！你可以唔請，不過Richard下個月就上位喇！我跟硬佢嘅！」佢眼睛一轉，立即轉語調：「啊！好簡單啫！冇問題！今晚七點半大堂等，不見不散！」之後佢話趕時間要上去先，我睇住佢背影，就知佢喺度肉赤緊，我真係好心涼，如果Richard同太子以後生生性性，都應該可以保佑我滾到退休之日嘅。

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。