闊太鴨店開眼界

經過上次長毛一役之後，我嘅戰意已經全部返晒嚟，依家每逢星期五我都會有唔同嘅溝仔約會，仲多姿多采過以前。連Ivana都忍唔住讚我靚咗又潤咗，梗係啦！我之前食齋食咗幾個月，搞到皮膚都乾晒，經過我一輪衝刺之後，食咗幾件好嘢，立即由底滋潤到上面，梗係容光煥發啦！我自己照鏡都覺得狀態好好，於是今晚又約咗闊太Judy，去佢嘅闊太鴨店玩！

我Barbara一向都好少叫鴨，唔係未試過，不過我一向唔鍾意金錢交易，而且我唔驚溝唔到仔，所以好少踏足鴨店，不過今日遇着闊太Judy就冇辦法！佢一向認為有錢大晒，唔使咁辛苦出去頻撲，手上攞住花碌碌嘅銀紙，就算幾靚仔都要屈服於佢嘅裙底之下。佢又有佢嘅道理嘅！反正佢大把錢使唔晒，當係造福人群都好嘅！佢一入到鴨店，就立即有幾個爸爸生衝埋嚟招呼佢，而我就眼尾都冇人望，果然係有錢大晒！

我哋一坐低酒都未到，就已經有4、5個猛男氹氹轉，出出入入，不過闊太Judy一個都睇唔上眼，佢哋惟有死死地氣行番出去。跟住紅酒送到，我哋就一邊歎紅酒、一邊睇住好多鴨仔輪流出場，有大隻、靚仔、斯文、粗獷，仲有Band仔模樣，連我都睇到眼花繚亂，大嘆依家嘅鴨店真係多花臣。終於Judy嘅目光停留咗喺一個好嫩口嘅鴨仔身上，呢隻鴨仔其實冇咩特別，但勝在嫩口得嚟而且好怕醜……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。