世界波:惡魔遊樂場 索女肉搏好Crazy

自原始時代開始,女人嘅工作主要負責生仔同採摘果實,而同猛獸戰鬥,獵取其肉食毛皮等耗費大量精力和狠勁嘅工作,則落到男人身上。不過時移世易,要鬥狠,女人一樣不遑多讓,唔信?去美國惡魔遊樂場見識吓先講啦!

小弟落酒吧一向都唔揀劈場,皆因我想靜靜哋同班兄弟飲酒,同時傾吓溝女經,故此經常充斥猜枚噪音嘅酒吧絕對唔適合我。不過,如果畀我去到美國荷里活嘅Dragonfly的士高,我就絕對唔介意於如此嘈雜嘅環境中飲酒,皆因此處舞台上有大班索女兇狠較量,扯到褲甩Bra飛好精彩。

泳池摔角

Dragonfly嘅舞台又叫做Devil's Playground,即係惡魔遊樂場,但係睇落又唔係裝修到好似地獄咁啫,點解會有個咁嘅名呢?據講係同舞台經常上演嘅索女摔角有關。舞台上面安設咗一個吹氣泳池,四邊都有擂台繩同繩角,儼如一個迷你擂台一樣。

幾乎每一晚,擂台上都有身穿比堅尼嘅索女對壘,佢哋一聽到擂台鐘聲響起,就會不顧一切,一往無前,有前冇後咁向對方攻擊,又扯頭髮又扯衫褲,狠勁絕對唔輸畀正宗摔角手,而目的除咗為爭奪獎金外,最重要係帶動現場氣氛。

由於佢哋扯得太狼死,所以成日都會有索女被扯到飛Bra走奶,令台下觀眾興奮狂叫!台上嘅索女咁兇狠,台下嘅觀眾又瘋狂到幾乎失控,就係因為咁,所以得到惡魔遊樂場呢個名稱。另外,舞台上除咗索女肉搏,亦有大量鋼管舞、艷舞表演,感覺狂野又具娛樂性,簡直睇到你唔捨得走!

推波助瀾

雖然索女肉搏每次都將戰場定於呢個惡魔遊樂場,不過觀眾一定唔會睇到悶,因為除咗班索女時常換人之外,仲有好多元素為擂台增添姿采。例如吹氣泳池入面可以空無一物,二人乾巴巴互鬥,亦可以加入啤酒、啫喱、泥漿、朱古力漿,令班索女玩到成身黐。一來增加難度,二來又可以加強官能刺激。觀眾們睇得精彩,但唔止得個睇字,因為大家只要記熟兩個手勢,就可以唔受現場噪音影響而向心水索女下達指令。

第一個手勢就係「Why Shock Her?」(點解o趙佢?)用於見到心水索女受制時,向敵方索女使用,而動作就係向擂台舉高手掌,食指及尾指向內屈埋。第二個手勢就係「Spock Her!」(插佢!)用嚟推波助瀾,叫索女狂o趙對手,而動作亦係舉起手掌,但中指同無名指盡量分開,而中指貼住食指,無名指則貼住尾指。只要記熟呢兩個手勢,於適當時候落指令,咁就會令你睇得分外投入,自然Happy好多啦!

Fat Bo