火星急Call棄舊菜

上星期八完Moni件艷事之後，成個禮拜都靜英英，搞到我無心工作，腦海裏面殘留咗一啲拉丁仔同Moni嘅肉搏片段，不過大家唔好誤會，我絕對唔係對拉丁仔有留戀，只不過佢嘅床上功夫的確係有一手，算係我所有對手中嘅頭五位，所以間中約出嚟回味吓都不為過啫！抖咗成個禮拜，我都係時候出動，原本已經安排好尋晚去睇「杜蘭、杜蘭」，係一個40幾歲嘅EX……EX……EX……Boyfriend約咗我，其實我又唔係好有興趣，但見佢盛意拳拳，又買埋飛，就當係敍吓舊啦！反正我都好耐冇食過舊菜，都可以當係調劑品嘅！

點知出門口嘅時候，「溝仔良伴」Ivana突然打電話嚟，話識咗班筍貨，件件都係精挑細選，唔食一定走寶，我立時心大心細，依家先推咗件舊菜又好似好衰咁，好驚有報應，於是收線之後，立即打畀樓上嘅至八會長Macy，話我有場「杜蘭、杜蘭」突然唔得閒去，問佢有冇興趣，佢竟然流晒口水話正，於是我畀咗舊菜電話佢，叫佢哋自己聯繫。

之後，我即刻換過晒啲戰衣，二話不說就直衝去「火星人」約好嘅地點。去到之後，環顧四周終於見到佢坐喺餐廳最埋嘅一個角落，食緊半打Belon 000000生蠔，我立即坐埋去：「嘩！使唔使咁補呀！」佢一邊食一邊答我：「呢度啲法國生蠔好正o架！同一陣班仔一樣咁正，唔食就笨……」我望住佢副食相，立時唔係幾開胃，於是叫佢拿拿臨食晒佢，費事一陣班仔嚟到畀佢嚇走晒，我就真係笨喇！（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。