爸打必讀 寶貝二三事

點先叫無聊至極？睇睇近日短片網站，幾件港青居然喺街頭拉牌以免費請人踢下體（Free Kick in the Nuts）取代抱抱關懷，引嚟十多名男女毫不留情喪踢，發起者更以大特寫痛苦表情為樂！結果被網友一面倒寸爆，話踢爆唔使恨喎！年少無知當然不值得鼓勵，但話時話，閣下又對自己嘅「寶貝」了解幾多呢？今日就同你分享吓寶貝事！

男人要爽，通常會搵人親熱吓，若然冇女喺身邊，就自不然需要自我解決。但打「機」同砌女呢啲本能嘢，基本上係男人都識，不過講到點樣保養支炮，就可能即刻O晒嘴。呢方面老外就緊張得多，早前英國網站「ivillage」就發表咗一個名為《21 Things You Didn't Know About Penise》嘅研究報告，指出一般人對陰莖嘅錯誤認知或懵然不知，有啲都幾過癮，各位爸打不妨睇睇。

自娛險自宮

陰莖折斷呢個Term近幾年經常出現，通常都係發生喺情侶過激嘅性行為過程中，但原來喺美國，更多情況係喺自娛時發生，而且自娛時折斷通常唔會即時感到劇痛，更冇明顯創傷，多數係勃起充血時至感覺異樣，所以假如你感受到寶貝充血時唔自然或有痛楚，最好盡快求醫，否則血液唔通引致組織壞死，下個性功能障礙患者可能就係你！

游水變縮水

游水對身體健康有利，但亦要小心害死「細佬」。性學家多年前已指出，天氣寒冷及冷水係男人「不共戴天嘅敵人」，事關睾丸內嘅精子需要溫暖環境才能發揮功效，而長期浸於冷水則會傷害精子，更會令陰莖收縮，假如游水後或於冷水中親熱，分分鐘磨到出血都未有高潮呀！

揼波鐘 自作自受

雖然性學家甚至兩性學者，都贊成男人要多花時間喺性愛上，藉此令女伴更易得到性高潮，但所指嘅花時間應該係喺前奏上。偏偏有啲男人就刻意拖長性交時間，阻撓發射，以顯得自己持久力驚人，結果令陰莖長期處於充血狀態，影響血液循環，長此下去會令陰莖變成半硬不軟，甚至惡化到變性無能。

6%男人 天賦異稟

性學家Dr.Fiske曾為不同人種做過統計，黑白黃皮膚嘅正常男士，靜止狀態普遍約係3至4吋、勃起後有5至6吋經已足夠滿足女士所需，嫌唔夠大純粹出於男人自卑心理！

更有趣嘅係，安全套生產商嘅報告踢爆男人自欺欺人，原來全世界只有6%男士需要用大碼或加大碼嘅安全套，其餘男性都係用正常尺碼已足夠，買大碼純粹係為滿足心理需要，令女人覺得佢天賦異稟。

軟硬兼施 無補於事

男人朝思暮想都希望可以保持雄風，實情任何運動或藥物都只可以緩減性功能下降嘅速度，而冇辦法令你雄風再現。醫學報告亦指出，男性嘅發育最多到20歲就會停止，隨住年紀愈大，性功能日趨下降，壯陽藥或整形只屬短暫性改善方法。坊間亦有人認為飲酒可以助性，但其實只係有助於調情，反而飲酒過量會容易令陰莖偏軟，甚至出現早洩添！