世界波：男人識挑逗有女埋身

男女之間嘅神秘吸引力，除咗嚟自天生嘅異性相吸之外，美國韋伯斯特大學嘅心理學家莫妮卡指出：「挑逗亦係令男女雙方互相吸引嘅方式之一，而挑逗更加係人類與生俱來嘅本性，能夠令男女雙方盡量突出自己嘅長處去吸引對方，測試雙方嘅感覺之餘，亦可增加自己嘅吸引力。」

男人想做萬人迷，首要條件就係學好挑逗呢部分，先有機會增加自己嘅魅力，同時吸引異性嘅注意。不過專家又指出，挑逗要掌握得宜，過度表達則會引起女性反感，所以進行挑逗之時，一定要留意對方嘅反應及選擇合適嘅場地嚟進行。

因應環境

畀女人放生電，相信好多男人都試過，但向女人放生電，就唔係好多男人敢做，萬一揀錯對象同場合，畀人鬧係鹹濕佬就認真o架。其實男人放電，女人一樣會受，不過一定要配合環境，工作時候就盡量可免則免，因為女人喺唔放鬆嘅情況下，好難過電，除非你真係俊朗不凡，引人入「性」又唔同講法！

衣着整潔

男人睇女人，一般都係睇外表，樣靚身材正，唔使放電都已經流晒口水，但係女人睇男人，好多時唔係齋睇樣，反而衣着、談吐舉止更為重要。所以男人向女人作出挑逗時，麻煩先整理一下自己嘅衣着，就算唔係高品味，都必須要整潔有個性，言行舉止更要有風度，先可以令女人願意接收你嘅挑逗訊號。

不斷變招

根據心理學家莫妮卡嘅研究指出，男人如果挑逗得宜，絕對可以引發女人內心嘅性慾本能，但要注意發放挑逗訊號時，唔可以次次都千篇一律，要不斷轉換方式。當面對不同類型嘅女性，就要用不同嘅挑逗方式，好似喺酒吧遇上惹火尤物，不妨主動行近，利用身體接觸及語言挑逗；但如果喺咖啡室遇上斯文OL，就不妨多用眼神交流，試探對方嘅底蘊，先作進一步行動。

展現長處

男人主動挑逗女人，對於一啲怕醜仔而言，絕對係一件超級難事，如果你都有呢個問題，可嘗試展現長處去吸引對方，從而令雙方展開初步交流。不過專家話呢種方法，好容易令女性覺得幼稚，所以掌握表達嘅時機係最重要，千祈唔好喺太多人嘅公眾場合度表達，否則好易弄巧反拙。