網絡美人凱迪

今日介紹一位炙手可熱嘅女模畀大家認識，話說兩年前呢位小妮子參加一個電視求職節目，竟惹來兩位大老闆嘅爭奪，更有人話要開戲畀佢做女主角，呢位咁巴閉嘅靚女，就係凱迪。

嚟自吉林嘅凱迪，喺重慶嘅電影學院畢業後，就參加天津衞視一個求職節目，原本佢想應徵配音員，由於佢外表出眾，獲得同場兩位老闆賞識，一個係華誼總經理，另一個係香港著名影星呂良偉。

一鳴驚人

節目中，呂良偉為咗爭贏，更拍心口話要開戲力捧凱迪，令到對手一時無法招架。節目完結後，凱迪雖然未即時獲得演員合約，但因此而人氣大升，更聲價百倍，單係去年就拍攝咗超過20個廣告，仲客串演出過幾部電影，成為炙手可熱嘅新人。及後佢轉投模特兒界發展，講真凱迪樣子甜美，身高172cm，上圍有35吋，配埋一雙42吋長腿，天生模特兒嘅材料。

魅力無限

同凱迪合作過嘅攝影師，當然識得好好展露佢嘅優點，所以喺佢嘅寫真作品當中，不乏性感艷照，而且每位攝影師都能夠把凱迪嘅性感魅力充分展現，無論係純情定狂野造型，都各具味道，所以只要凱迪嘅照片一上載，除咗官方網站嘅點擊率爆晒燈之外，更會即時被網友轉貼，瀏覽人數極高，故凱迪被網友稱為「網絡美人」。最近凱迪拍埋電視劇，工作十分忙碌，以後除咗喺網上，只要打開電視都可以欣賞到凱迪嘅演出啦！

凱迪Profile

出生地：吉林

三　圍：35-24-35

身　高：172cm

興　趣：唱歌、書法