北夜天：合肥援交妹　On Call 24小時

最近一齣電視劇講醫生要On Call 36小時超辛苦，原來內地嘅性工作者，亦閒閒地做足24小時，好似合肥一班90後援交妹咁，日頭返髮廊、骨場，夜晚就到夜總會開工，期間有客柯打仲要上酒店提供服務，24小時全天候不停砌！

唔好以為呢班援交妹咁拚搏，一定係被雞頭操控，查實佢哋只不過係為咗搵多啲錢，其中一位囡囡表示：「單靠喺網上拉客，生意同收入都唔多，所以日頭喺骨場兼職做技師，雖然呢個時段比較少客，但因為全職技師通常都唔鍾意返日頭，自然競爭少咗，上鐘機會反而更高。如果接到兩個客的話，就有六百蚊收入，遇到客人出手闊綽，事後都會打賞百元小費，相當和味o架！」

走三場抓銀

囡囡繼續話：「至於喺髮廊做，雖然肉價只係幾百蚊，但勝在時間自由，而且唔使花太多工夫服侍客人，一般入房後20分鐘就完事，由朝早7點開工到10點，生意旺嘅可以『入閘』三次，收入四、五百蚊一定有，未有客人嘅時候，就會休息養精蓄銳，準備返骨場接更搏殺！」

早午時段都咁「充實」，到咗夜晚就返夜總會當小姐，佢哋通常會幾位相熟姊妹分開幾間場做，一個喺A場開工，其他喺B、C、D場落腳，邊間場生意最旺，之後就拉埋其他姊妹過場做，總之有錢齊齊搵。囡囡透露：「雖然我冇計過早午晚一共接咗幾多個客，但可以肯定，每日收入唔少過二千蚊，相當唔錯！」