集郵女：逃離拉丁魔咒
同拉丁情人激戰一晚，真係搞到我死去活來，結果我哋總共做咗4次，真係人生值得紀念嘅日子。而事後佢一副情深深、雨濛濛嘅樣，深得女人芳心。可惜我Barbara份人唔鍾意隨波逐流，人做我唔做，所以佢咁嘅樣，我反而要扣分。佢可能都覺得我嘅反應好奇怪，於是基於唔輸得心態，對我反而更加投入。所以自那一晚之後，佢竟然隔日就來電，嘩！真係煩死人冇命賠，我純粹想食餐好啫，唔代表我日日都要鋸扒o架！
佢唔係唔明我嘅諗法，但就係因為我唔受溝，所以先至對我特別落力，如果我好似其他女人咁冧佢，佢就唔會煩我。以前有好多姊妹同我講，男人係世界上最犯賤嘅動物，我都唔係好信，因為我覺得女人都一樣啫！依家見識咗呢個拉丁仔，先相信佢哋嘅說話。所以家陣唯一嘅辦法，就係搵呢班姊妹幫手，先可以逃離呢個拉丁魔咒！
Cici就係第一個畀我煩嘅姊妹，佢聽完我嘅故事之後，就嘆一口氣話：「點解有啲女人可以咁好命，而我就出盡法寶，都遇唔到個男人對我咁好……」我聽完之後，即刻「沙冧」收線，後來第二位姊妹Moni話畀我聽，原來Cici近年深受感情打擊，精神有啲異樣，好似仲食緊啲抗抑鬱藥等等，我簡直就係喺佢傷口灑鹽！罪過、罪過！
不過Moni自己都唔好得去邊，佢話3年前嫁咗件老外，以為自己高人一等，可以移民去外地做少奶奶，點知原來件老外係「空心老倌」，仲要有變態性癖，搞到佢積蓄散盡，依家兩頭唔到岸，人又老、錢又冇，老公又變態，真係人間悲劇……（待續）
Lady Barbara
某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。